श्यामसुन्दर यादव
राजविराज, भदौ ४ गते । संघीय समाजवादी फोरम नेपालका राष्ट्रिय अध्यक्ष उपेन्द्र यादवले शहीदको सम्मान गर्नु राज्यको दायित्व हो भन्दै देश र जनताका लागि सहादत दिनेहरुको लागि नै ५० लाख रुपैयाँ दिनु पनि कुनै ठूलो कुरा नभएको बताएका छन् ।
शुक्रवार विहान राजविराजमा मधेशी पत्रकार संघ सप्तरी शाखाले आयोजना गरेको पत्रकार सम्मेलनमा बोल्दै उनले यस्तो बताएका हुन् । ‘पन्ध्र वर्ष अघि सरकारले लोकतान्त्रिक आन्दोलनमा सहादत प्राप्त व्यक्तिलाई दश लाख दिने घोषणा गरेको हो’ उनले भने ‘अहिले पचास लाख दिए पनि त्यसलाई त्यति ठूलो भन्न सकिन्न ।’
‘संविधानसभाबाट मधेशी मोर्चाको एक घटकले संविधानसभाबाट राजिनामा दिईसकेको छ नि ?’ छेउमै बसेका सद्भावना पार्टीका अध्यक्ष राजेन्द्र महतोतर्फ शंकेत गर्दै सोधिएको प्रश्नमा यादवले भने ‘राजिनामा दिनु नदिनु कसैको स्वेच्छाको कुरा हुन सक्छ, मोर्चामा त्यस्तो निर्णय भएको छैन ।’ नेता यादवले आफ्नो पार्टी सदन र सडक दुवैबाट अधिकारप्राप्तिको आन्दोलनमा नेतृत्वदायी भूमिका निर्वाह गरिरहेको दावी समेत गरे ।
सोही पत्रकार सम्मेलनमा सद्भावना पार्टीका राष्ट्रिय अध्यक्ष राजेन्द्र महतोले विगतका आन्दोलन र परिवर्तनको कुरालाई नजरअन्दाज गरी गणितीय अहंकारमा प्रतिगामी संविधान बनाउने षडयन्त्र भएकाले आन्दोलन बाध्यात्मक रहेको जिकिर गरे । उनले भने ‘ठूला चार दलको अहंकारले वर्षौंदेखिको जनचाहना र आन्दोलनको उपलब्धि गुम्ने खतरा आएको छ, हामी समान बिचार राख्ने अन्य शक्तिसँग समेत मिलेर आन्दोलनलाई निर्णायक बनाउनेतर्फ लागेका हौं ।’
विगतका सहमति र सम्झौता पालना गरी अन्तरिम संविधानको भावना अनुरुप संविधान बनाइए वार्ताको पनि आवश्यकता नरहने उनको भनाइ छ । पत्रकार सम्मेलनमा तराई मधेश लोकतान्त्रिक पार्टीका अध्यक्ष महन्थ ठाकुर, मधेशी पत्रकार संघका केन्द्रिय अध्यक्ष पंकज दास समेत उपस्थित थिए ।
